AASU-te'n Citizenship Bill an do zel dawn

All Assam Students Union (AASU) chuan Citizenship (Amendment) Bill, 2016 chu eng kawng maha an pawm theih loh thu leh, an do zel tur thu an sawi.

He bill hi Pakistan, Bangladesh leh Afghanistan aṭanga Hindu, Sikh, Buddhist, Jain, Parsi leh Kristian lo lut te hnena India khua leh tui nihna pek theih tura duan a ni. Citizenship (Amendment) Bill, 2016 hi Joint Parliamentary Committee-ah thehluh a ni dawn a, Satyapal Singh-a kaih-hruaina hnuaiah uluk taka zirchian a nih hnuin, Parliament-ah pharh a ni ang. AASU chuan Joint Parliamentary Committee dawr turin palai an tir dawn tih sawiin, harasatna awm thei hrang hrangte an thlen dawn tih AASU adviser Samujjal Bhattacharyya chuan a sawi. AASU hian a hma pawhin he bill an duh loh thu hi an lo auchhuahpui fo tawh a, kum 1971 hnu lama Assam-a lutte chu khua leh tui nihna pek theih a nih loh thu an sawi uar hle.

Hetih lai hian Assam Pradesh Congress Committee (APCC) pawhin, Chief Minister hlui Tarun Gogoi-a kaihhruainain hma an la ve mek a, Citizenship (Amendment) Bill, 2016 an pawm theih loh chhan hrang hrangte October 31-ah All India Congress Committee (AICC)-ah an thlen tur thu an sawi.