Manipur Congress-te'n Modi-a lim an hal

Manipur Pradesh Mahila Congress Committee chuan Chief Minister O Ibobi Singh-a'n Ukhrul district-a beih a tawk chu an duh loh zia lantirin, Prime Minister Narendra Modi lim an hal a, PM chu Naga helte laka hma la chak tawk lohah an puh. Modi bakah hian Nagaland Chief Minister TR Zeliang leh National Socialist Council of Nagaland - Isak-Muivah (NSCN-IM) General Secretary Th Muivah-te lim an hal bawk.

Manipur CM hian Thawhlehni khan beih tawkin, Manipur Mahila Congress unit leh Manipur Pradesh Congress Committee (MPCC) te chuan CM thlavang hauhna an lantir a ni. MPCC president Loitongbam Tilottama chuan, "Naga hel NSCN (IM) chu helah puang turin sorkar laipui kan phut a ni, Manipur hmun hrang hranga pawikhawihna an thlen ṭhin hi titawp tawh rawh se" tiin, sorkar laipui chu NSCN (IM) te pawikhawihna titawp tura an duh thu a sawi. Tilottama chuan Nagaland CM TR Zeliang chu Naga helte khuakhirh tura a duh thu a sawi bawk.

Manipur Congress-te'n CM thlavang hauhna hun an hman hi Governor Dr Najma Heptulla chuan telpuiin, Ukhrul-a thil thleng chu a dem takzet thu sawiin, tun hnuah chuan thleng tawh lo se a duh thu a sawi. Heptulla chuan tharum thawhna chuan rah ṭha a chhuah lo tih sawiin, sorkar hmalakna dodal zawnga chet chu thil atthlak tak a ni, a ti. Chief Minister Singh chuan October 24-a Ukhrul District-a tharum thawhna thleng chu sorkar laipuiah thlen a nih thu sawiin, sorkar laipui chu hel te lakah chak zawka hma la tura a duh thu a sawi.

He thil thleng chhui tur hian inquiry committee din a ni tawh a, Additional Director General of Police (ADGP) P Doungel kaihhruainain hma lak nghal a ni. ADGP chuan kar khat chhungin report peih hman a nih tur thu a sawi. CM-in beih a tawh chhanah hian security ṭhat tawk loh vang nia tarlan a ni a, police officer mi 10 te chu suspend an ni tawh.

Naga helpawl, NSCN-IM leh sorkar laipui te chuan nikum khan inremna thuthlung an lo ziak tawh a, inremna tluantling erawh a lo awm lo nia hriat a ni. NSCN-IM hian hmun hrang hrangah pawikhawihna an thlen fo avangin sorkar laipui chu inremna tluantling a awm theih nana hma la turin state sorkar leh pawl hrang hrangte chuan an ngen fo a ni. Manipur CM beituah NSCN-IM-te chu mawhphurtu berah puh an nih leh tak avangin Manipur Mahila Congress unit leh Manipur Pradesh Congress Committee (MPCC) te chuan Prime Minister Narendra Modi chu chak zawka hma la turin an phut a ni.