Sonowal tan 'Z Plus Category' security dil sak

Assam Chief Minister Sarbananda Sonowal chu Manipur Chief Minister Okram Ibobi Singh-a'n beih a tawh hnuah venhimna ṭha zawk pek a nih theih nan, state home department chuan union home ministry-ah 'Z Plus Category' security a dil sak.

Sonowal hi Z Plus Category security pek a nih theih nan hma lak mek a nih thu hi home department official chuan a puang tawh. Assam CM venhimna khauh zawk pek chungchang hi state sorkar chuan a ngaihtuah tawh a, sorkar laipuiah rawtna thehluh a ni tawh bawk. Hetih lai hian Sonowal hian a security tihnep nan, amah vengtu security motor pawh eng emaw zat chu a lo awl tir tawh a ni. Mahse Naga hel, National Socialist Council of Nagaland - Isak-Muivah (NSCN-IM) ten Manipur CM Ibobi Singh an beih hnuah, Assam CM hi venhimna khauh zawk pek a nih theih nan hma lak a ni leh ta a ni.

Sarbananda Sonowal-a Z+ security pek a nih theih nan hian Ministry of Home Affairs chuan phalna a pe chhuak thuai dawn ni atarlan a ni. Assam chief minister zingah, Congress hotu Tarun Gogoi leh Prafulla Kumar Mahanta-te chu 'Z Plus Category' security pek an lo ni tawh a ni. 'Z Plus Category' security hi India rama venhimna pek theih sang ber a ni.