Manipur BJP-te'n Deputy CM ban phût

Manipur state BJP unit chuan Manipur Chief Minister Ibobi Singh-a'n beih a tawh chungchangah, Home Ministry changtu deputy CM Gaikhangam chu a hna hleh tawk loah puhin, bang turin an phût.

State BJP vice president Asni Kumar chuan, "Deputy CM hian a department chan a enkawl zo lo tih a chiang hle a ni, a nihna aṭang hian bang turin BJP chuan kan phût a ni. State sorkar chuan CM-in Ukhrul a tlawh tur mipuiin an dodal tih hre chungin venhimna ṭha tawk a pe lo a, heng zawng zawngah hian mawhphurtu chu Home deparment enkawltu a ni a, chuvangin bang turin kan phût a ni" a ti. Kumar chuan, dodalna a awm chunga sorkarin hma a la lui chu an dem tih a sawi lang bawk.

Inner Line Permit chungchanga state sorkar hmalakna chu ṭha an tih loh thu sawiin, tribal-te'n nasa taka an dodal chunga sorkarin beng a chhu ngawng lui tlat chu an hriatthiam loh thu BJP vice president chuan a sawi. Congress sorkar chu “CCC’’ (Corruption, Commission and Cruelty) tiin a sawi bawk.