Dalai Lama-a'n Arunachal a tlawh phalsak

Prime Minister Narendra Modi-a kaih-hruai sorkar laipui chuan Tibetan sakhaw pui-thiam Dalai Lama chu Arunachal Pradesh tlawh phalna a pe nia tarlan a ni.

Ruahman dan chuan Dalai Lama hian March 2017-ah Arunachal hi tlawh ang a, zan li vel riakin state chhung hmun hrang hrang a tlawhkual dawn a ni. Sorkar laipui chuan Thawhlehni khan Dalai Lama-a'n Arunachal a tlawh tur chungchangah hian thuchhuah siamin, "Dalai Lama-a'n India hmarchhak state Aruna-chal a tlawh turah sorkar lam aṭangin harsatna awm lo" a ti. Arunachal CM Pema Khandu chuan an state tlawh tur hian Dalai Lama hi a sawm nia tarlan a ni bawk.

Hetih lai hian Dalai Lama-a'n Aruanchal Pradesh a tlawh tur hi China chuan a helh hle rin a ni a, Arunachal hi a ram bung pakhatah a chhiar tel a ni. US Ambassador Richard Verma chuan kar kalta Zirtawpni khan Arunachal Pradesh a tlawh a, he hi China chuan nasa takin a lo sawisel tawh a ni. Chinese Foreign Ministry thupuangtu Lu Kang chuan US chetdan chu China-in a duh loh thu sawiin, US Ambassador Richard Verma-a'n India-China border a tlawh chungchang sawifiah turin US sorkar a phut. Dalai Lama-a'n Arunachal a tlawh tur chungchangah pawh hian thawm a neih leh ngei rin a ni.