Assam-in sorkar hnathawkte hlawh pe thei lo mai thei
Assam finance minister Himanta Biswa Sarma chuan sorkar laipui aṭanga puihna an dawn loh chuan May thlaa sorkar hnathawkte hlawh chu an pe thei lo mai thei tih a sawi.
Thawhṭanni khan Guwahati-ah press conference neiin, minister chuan May thla chawlhkar khatna hnu lamah sorkar hnathawkte April thla hlawh chu an pe thei dawn chauh tih a sawi bawk. "May thla hi kan tan hun harsa tak a ni dawn a, treasury hi eng angin nge kalpui a ni dawn tih pawh ka hrethiam hrihlo a ni. Mahse May 7 hnu lamah chuan April thla hlawh erawh chu kan pe thei ang," a ti.
"Mahse pawn lam aṭanga puihna kan dawng a nih loh chuan June thlaah chuan sorkar tan hlawh pek a harsa tawh hle ang," tiin minister chuan a sawi. Sum lakluhna tur dang ngaihtuah tur chungchangah GST Council chauhin thutlukna a siam thei a ni, a ti bawk.
Sarma chuan Pathianni khan union finance minister Nirmala Sitharaman nen inbiain, an state sum dinhmun pawh a rawn zawtchiang tih a sawi. Sitharaman hian sum dinhmun chungchang sawipui turin state zawng zawngte chu video conference a la neihpui dawn a ni, a ti.