Arunachal-ah women college din dawn

Arunachal Pradesh education minister Honchun Ngandam chuan Poma khua-ah women college din a ni dawn tih a sawi.

Education minister Honchun Ngandam, urban development (UD) minister Nabum Rebia leh Doimukh MLA Bamang Felix-te chuan kar kalta Inrinni khan college dinna tur hmun tur hi an enfiah a ni. Harsatna dang a awm a nih loh chuan Poma-ah hian Arunachal-a a hmasa ber turin women college hi din a ni dawn tih an sawi. College dinna tur hmun chungchangah hian hun rei tak chhung harsatna a awm a, kum hnih chhung tihkhawtlai a ni. Hetih chhung hian Lekhi khuaa UD department building-ah college hi kalpui lailawk a ni a, tunah chuan a dinna tur hmun thlan fel a ni ta a ni.

Poma khuaa college din a nih theih nan hian ram neitu mi parukte chuan an ram an pe nia tarlan a ni. MLA Felix chuan college din nana ram petute chu fakawm a tih thu sawiin, Poma khaw mipuiten ṭangkai taka an hman ngei a beisei tih a sawi. Women college hi National Hydroelectric Power Corporation (NHPC) hnuaiah din a ni a, peihfel a nih hnuah state education department kutah hlan a ni ang. Arunachal-ah hian National Institute of Technology (NIT) din turin hma lak mek a ni bawk. Heng bakah hian law college, film institute, entrepreneurship development institute leh tourist resort-te dinbelh tura hma lak a ni bawk.