District tinah public library dah a ni dawn : Manipur CM

Manipur Chief Minister Okram Ibobi Singh chuan an state chhunga district zawng zawngah public library din turin state sorkar chuan hma a la mek tih a sawi.

CM hian kar kalta khan Imphal-a Public Library a hawng a, district tinah library dah a nih tur thu hi a puang a ni. Singh chuan, "Library chu hriatna leh finna min petu a ni a, thang thar lo awm leh zel ten an rochun theih tur library changtlung tak lo din chu thil fin thlak tak a ni" a ti. An state chuan Information Technology-ah nasa takin hma a sawn tih sawiin, chu chuan library hmangtute tan awlsamna a siam sak a, ṭangkai taka hman chhoh zel a ni ang, a ti. Imphal Public Library chu a bulṭannna a nih thu sawiin, chak takin hma lak chhunzawm a ni dawn tih a sawi.

Manipur-ah hian kum 1938 khan a hmasa ber ni turin Khwai Public Library chu hawn a ni a, Imphal Public Library hi kum 1947-a din a ni.