HIV vei tamna ber Nagaland

Nagaland State AIDS Control Society (NSACS) buatsaihin October 28 khan 'sensitization & training' programme neih a ni a, Nagaland chu India rama HIV/AIDS vei tamna ber nia tarlan a ni.

NSACS-in a tarlan dan chuan kumin April-September thla inkarah khan ṭhalai kum 25-34 inkar thisen test zinga 43% zet chuan HIV/AIDS an vei a ni. Kum 1999 leh September 2016 inkarah thisen test mi 8,99,158 an awm a, chung zinga mi 20,601 te chu an positive. HIV kai zinga 91% chu mipat hmeichhiatna aṭanga inkai chhawn a ni a, nu leh pate aṭanga kai naupang 6% an awm. Hetih lai hian doctor-te'n damlo thisen an pek aṭanga kai an awm lo thung a, a chhan tak hriat loha kai 2% an awm bawk.

Nagaland bikah Kiphire chu a hluarna ber niin, mihring cheng
aṭanga 2.56% zet chu HIV+ an ni, hetih lai hian Longleng-ah chuan vei an awm lo nia tarlan a ni thung. NSACS hnuaiah hian Integrated Counseling & Testing Center (ICTC) 54, Prevention of Parent to Child Transmission (PPTCT) 4, Mobile ICTC 10 leh Blood Trans-fusion Services (BTS) Care Support & Treatment 8 a awm mek a ni.

Minister of Health and Family Welfare P Longon chuan India ramah an state-in dinhmun duhawm loh tak a luah chu pawi a tih thu sawiin, a do letna kawngah chak taka hma lak a nih tur thu a sawi. P Longon chuan, HIV do tur hian state sorkar chuan hma a la mek reng a, chak zawka kalpui a
ṭul a ni, a ti. Hemi tur hian Nagaland state AIDS control society, family health international 360 leh NGO hrang hrangte chu state sorkar thawhpui turin a sawm bawk.