Ibobi Singh beitute na taka chhanlet an ni ang : Rijiju

Union Minister of State for Home Kiren Rijiju chuan Manipur Chief Minister Okram Ibobi Singh-a beitute chu na taka chhanlet an nih tur thu Pathianni khan a sawi.

Rijiju hian Pathianni khan Imphal a tlawh a, Ukhrul district-a CM Okram Ibobi Singh-a'n beih a tawk chu pawi a tih thu sawiin, inkahnaa hliam tuar India Reserve Battalion mi leh sa chu a dam thuai theih nan duhsakna a hlan. Rijiju chuan, boruak ralmuang a awm theih nan sorkar lapui chuan Nationalist Socialist Council of Nagaland-Isak-Muivah (NSCN-IM) te chu inremna a ziahpui tih sawiin, inremna palzuta pawikhawihna an thlen chu a dem takzet tih a sawi. Kiren Rijiju hian Mantripukhri Garrison-ah Assam Rifles-te ‘Diwali’ a hmanpui a ni. Diwali pualin Rijiju chuan sipai leh an chhungte chu duhsakna a hlan a, ram leh hnam chhan nana thawk an nih inhre reng turin a fuih. A bikin hmarchhak state-ah hel chetna a hluar avangin sipaite chu a beihlet kawngah thah thlah lo turin an ngen bawk.

Manipur CM hi October thla laihawl khan Ukhrul district-ah sorkar programme pawimawhah kalin, NSCN-IM-te'n an lo bei a, inkahna thlen hnuah CM hi Ukhrul helipad aṭangin Imphal-ah hruai let leh a ni. Ukhrul district-ah hian khum 100 awmna hospital leh power sub-station hawng tura kal a ni. CM Okram Ibobi Singh-a beih a nih hi an dem thu political party leh pawl hrang hrangte chuan an sawi tawh. He thil thlen hnu hian Assam chief minister Sarbananda Sonowal chu venhimna khauh zawk pek a nih theih nan Assam home deparment chuan Z+ category securtiy pe turin a lo dilsak tawh bawk a ni.