Thamna sum la hrem zel an ni ang - Sonowal

Assam Chief Minister Sarbananda Sonowal chuan Assam Public Service Commission (APSC) official zingah thamna la an awm a nih chuan hremna pek an nih tur thu a sawi.

Tun hnai khan APSC official zingah thamna sum la an awm nia sawi a ni a, hei hi chhui chian a nih tur thu Assam CM Sonowal chuan a sawi. He thilah hian APSC member, personal security officer (PSO) Mabood Ali Choudhury chu Pathianni khan man a ni a, a ni bakah hian Dibrugarh Town and Country Planning department assistant engineer Nabakanta Patir pawh man a ni. Patir hian thamna sum cheng nuai 10 a la nia tarlan a ni a, chhui chian mek a ni.

Assam police-te chuan tun hnaia Assam Public Service Commission hnuaia family welfare department-a thawk tur dental surgeon post 60 laknaah thil fel lo a awm ngei tih sawiin, candidate
ṭhenkhat ten APSC official-te thamna sum an pe niin an tarlang. He thil thleng hi Assam CM chuan pawi a tih thu sawiin, thil dik lo titute chu hrem loha an chhuah loh tur thu leh, sorkar hnathawk eirukna laka fihlim lo te chu na taka hrem zel an nih tur thu a sawi. State sorkar chuan eirukna a do zel dawn tih Assam Chief Minister Sarbananda Sonowal chuan a sawi lang bawk.