BSF leh BGB-te'n Joint cultural programme buatsaih

India leh Bangladesh border guard-te chuan ram pahnihte inakarah inṭhianṭhatna a awm zel theih nan Agartala-Akhaura (Bangladesh) check post-ah Thawhṭanni khan joint cultural programme an nei.

He hunah hian India Border Security Force (BSF) leh Border Guards Bang-ladesh (BGB) te chuan an thiam thil an entir a, ngaihhlut an hlawh hle. BGB 12th Battalion Commandant Lt. Col Md Shah Ali chuan ram pahnihte inkarah inṭhianṭhatna a awm zel theih a beisei thu sawiin, chutiang tur pawh chuan hma lak reng a ni, a ti. Kawng hrang hrangah thawhdunna ṭha zawk neih zel an duh thu sawiin, a bik takin hel do let kawngah ram pahnihte chuan thawhhona ṭha an mamawh thu uar takin a sawi. He hunah hian senior BSF leh BGB official leh an chhungte ṭhahnem tak an tel a ni. Hetih lai hian journalist-te chuan joint cultural programme hi an boycott nia tarlan a ni.

India leh a thenawm Bangladesh inri-a thui zawng hi km 4,096 zet a ni a, West Bengal (2,216 km), Tripura (856 km), Meghalaya (443 km), Mizoram (318 km) leh Assam (263 km) te'n Bangladesh hi an ri a ni.