External Affairs Ministry-ah MWC zualko dawn

Manipur Women Commission chuan Malay-sian High Court-in drugs tawlhruk chungchanga thiam loh a chan tir, Mani-pur hmeichhia Sangeeta Sharma Brahmacharimayum chungchang chu External Affairs Ministry-ah thlen an tum thu an sawi.

Malaysian High Court chuan Brahmacharimayum hi thiam loh chantirin, thi turin a chungthu a rel a, hei hi duh loin Manipur Women Commission-te chuan hma la turin Exter-nal Affairs Ministry an ngen dawn a ni. Women Commission Chairperson K Sobita chuan, "Brahmacharimayum hian tihsual a nei ngei a, mahse thi tura hremna pek hi sut leh a nih theih nan hma kan la dawn a ni. Hemi kawngah hian sorkar laipui pawh inrawlh turin kan ngen a ni" a ti. Imphal-a inkhuar Women Action Development (WAD) pawhin, "Malaysian High Court thu tlukna hi kan zah hle a, he ram dan hi palzut hi kan duh lo, nimahsela Brahmacharimayum chunga hremna pek hi dan hmanga veka khin let kan tum dawn a ni" an ti.

Sangeeta Sharma Brahma-charimayum (41) hi October 7, 2013 khan Penang Interna-tional Airport-ah Methamphe-tamine gram 1,637.1 man sak a ni a, a chung thu ngaihtuah a nih hnuah thi tura hremna pek a ni ta a ni. Malasia-ah hian Dangerous Drugs Act 1952 dan hnuaiah, ruihhlo khuahkhirh bik tawlhru tute chu thi tura hrem theih an ni. Hetih lai hian khawvel hmun hrang hranga Human Rights Activiest leh pawl eng emaw zat chuan Malaysian High Court-in Sangeeta Sharma Brahmacharimayum thi tura a chungthu a rel sak hi an duh loh thu an auchhuahpui a ni.