Citizenship Bill phurrit belh-chhahtu a ni thei : Mahanta

Assam Chief Minister hlui Prafulla Kumar Mahanta chuan BJP kaihhruai NDA sorkarin Citizenship (Amendment) Bill 2016 a duang chu Assam tan phurrit belhchhahtu a ni thei tih a sawi.

Mahanta chuan, “Bang-ladesh aṭanga dan loa pemlutte chu Assam sorkar phurrit thlentu an ni a, Citizenship (Amendment) Bill 2016 pass a nih chuan hei hian nasa takin phurrit a thlen belh thei a ni" a ti. Assam Accord ziaktu zingah a tel thu sawiin, inremna lo ziah tawh tihdanglam chu amah leh, an party chuan an remti ngai dawn lo tih a sawi. Union home ministry chu state sorkar leh sorkar laipui inremna lo ziah tawh chu zah tura ngenin, Sarbananda Sonowal-a kaihhruai BJP sorkar chuan he bill hi hnawl ngam se a duh thu a sawi.

Assam chief minister hlui chuan, tun hnaiah
ṭhenawm ram a tlawh thu sawiin, Bangladesh-ah hian Hindu-te chu an zalen a, ṭhenawm rama Hindu leh Muslim-te'n nekchep an tawk anga sawi chu a dik lo a ni, a ti. A bikin Tripura leh Assam sorkar tan chuan heng mite lo dawnsawn hi phurrrit a tling tak zet a, a awmsa te pawh dan anga an rama thawnlet an nih theih nana hmalak an duh tih a sawi bawk. Mahanta chuan minister of state for railways Rajen Gohain chu 'ABC of the Constitution' hrechiang loah puhin, vanduaithlak a tih thu a sawi. Gohain hian Mahanta hi Citizenship (Amendment) Bill 2016 hrechiang loah a lo puh tawh a ni.