APCC-te'n Congress dodal-ah Arunachal sorkar puh

3rd November, 2016

Arunachal Pradesh-a Hayuliang Assembly by-election neih turah, State Public Health Engineering and Water Supply (PHE&WS) department chief engineer Lapalum Kri chuan chuh a tum avangin Voluntary Retirement Scheme (VRS) a pension a dil a, hei hi state sorkar chuan a dansak niin Arunachal Pradesh Congress Committee (APCC) chuan an tarlang.

Chief engineer Lapalum Kri hian Hayuliang Assembly by-election-ah hian Congress ticket-a ding turin hma a la a, mahse pension a dilna chu Arunachal-a rorel lai People's Party of Arunachal (PPA) leh an thawhpui North-East Democratic Alliance-te chuan an dansak niin APCC-te chu an sawi. APCC president Padi Richo chuan, "Lapalum Kri hian September 5 khan VRS hi a dil a, mahse tun thlengin state sorkar chuan a dansak a ni. Congress high command chuan Kri hi official candidate atan a pawm tawh a ni" tiin, state sorkar chu Congress party hmalakna dodalah a puh. Hetih lai hian BJP ticket-a ding tur power department-a thawk lai Dasanglu Tulang Pul-a'n VRS a dilna chu pawmsak a ni thung niin Richo chuan a sawi a, PPA leh NEDA-te chu Congress hmachhawn ngam loah a puh bawk.

APCC-te chuan chief secretary chu Kri-a'n VRS a dilna ngaihtuah sak tura phutin, an thil phut a hlawhtling lo a nih chuan na taka nawr an tum thu an sawi. Hemi chungchangah hian Lapalum Kri pawhin Guwahati High Court-ah zualko a tum thu a sawi ve bawk. Hayuliang Assembly Constituency hi Aruanchal Chief Minister hlui Khalikho Pul-a bial niin, August 9 khan Pul hi a boral a ni.

Hayuliang assembly constituency by-election hi November 19-ah neih a ni dawn a, North East Democratic Alliance (NEDA) chuan candidate tur an puang tawh. NEDA candidate tur hi Aruchal Pardesh chief minister hlui Kalikho Pul-a nupui, Dasanglu Pul-i a ni a, BJP ticket-in a ding dawn nia sawi a ni. Hayuliang assembly constituency by-election atan hian November 2 thleng nomination thehluh theih a ni a, candidate-te hi vawiinah endik an ni ang a, November 5 thleng inhnuhdawhna hun hawn sak an ni ang.Vote tla te hi November 22, 2016-ah chhiar leh nghal a ni ang.