NSCN-IM-te'n district pek duh lo

National Socialist Council of Nagaland - Isak-Muivah (NSCN-IM)-te chuan Manipur sorkarin Sadar Hills leh Jiribam-te district puitlingah hlankai a tum chu an duh lo tih sawiin, hmalakna titawp turin state sorkar an ngen.

NSCN(IM)-te hian Thawhṭanni khan Hebron-ah emergency meeting an nei a, chief minister Okram Ibobi Singh chu Sadar Hills leh Jiribam-te district-a puang lo turin an ngen. Sadar Hills leh Jiribam-te hi hmasang ata Naga-te chenna niin NSCN(IM)-te chuan an sawi a, state sorkar chuan an ram chu a chhuh lui niin an sawi. Hetih lai hian Manipur CM chuan Jiribam sub-division chu revenue district-ah hlankai a ni dawn tih sawiin, district puiltingah hlankai nghal a ni dawn lo a ni, a ti. District-a puang tur chuan hun a la ngaih tam thu sawiin, sorkar hmalakna dodal zawnga che lo turin Ibobi Singh chuan an mipuite a ngen.

United Naga Council (UNC)-te chuan kar kalta Inrinni khan Sadar Hills leh Jiribam-te district pek an duhlohna lantir hian Manipur-a Naga te chenna bialah darkar 48 awh nawrh an huaihawt. UNC-te chuan hman aṭanga Naga te lo chen tawhna ṭhinna ram chu chhuh luih an ni mek tih sawiin, Naga aiawh leh Manipur sorkarin inremna an lo ziah tawh chu palzut a ni, an ti. Hetih lai hian All Naga Students’ Association, Manipur (ANSAM) chuan an ram chin chhuh luih an ni mek chu an duh lo tih an sawi a, Sadar Hills leh Jiribam te district pek an nih tur chungchanga an lungawi lohna hrang hrangte chu Governor Najma Heptulla hnenah an lo thlen tawh bawk. Naga Students Federation (NSF) pawhin Sadar Hills leh Jiribam-te district pek an duh loh thu hi an sawi tawh bawk.