Arunachal : AAPSU-in dan loa pem lut duh lohna lantir

All Arunachal Pradesh Students Union (AAPSU) chuan Thawhṭanni khan state pum huapin dan loa pem lutte duh lohna lantirin kawng zawh an huaihawt a, thupuiah 'No amnesty, just deportation' tih an hmang.

Rally huaihawt hi district students’ union (DSUs) hrang hrangten an lo thlawp a ni. Zirlaite bakah hnam bil pawl hrang hrang leh NGO member-te pawhin zawmin, state chhunga dan phal loha pem lut an pung zel an duh loh thu an sawi. Dan loa lutte lakah Arunachal venhim a ṭul thu thuziakte an keng a ni. Kawngzawhte chuan Chakma leh Hajong mi, state chhunga dan loa pem lutte thawnchhuah vat an phut thu an tlangaupui bawk.

AAPSU chuan state leilung fate dikna chanvo humhim tura an beih zel tur thu sawiin Arunachal Pradesh sorkar chu state pawn lam mi, dan loa state chhunga pem lutte dap chhuak a, electoral roll aṭanga an hming paih turin an phut. Dan loa an state-a pem lutte chu an ram lama thawn kir vek an phut tih an sawi.

Tezu, Namsai leh Roing-a MLA thlanna neih turah pawh Arunachal Pradesh-a schedule tribe ni lo ten vote thlak an tum leh tum loh hrechhuak turin special task force din an duh thu an sawi a, state leilung fate chauhin an hruaitu tur thlang tur hian dikna chanvo an nei a ni, tiin AAPSU chuan a tarlang.

Zirlai pawl hian zirtirtu posting leh transfer chungchangah dan khauh taka kengkawh turin sorkar chu an phut bawk. Zirtirtu ṭhenkhatin district danga sawn an nih tur venna atana medical certificate an theh luh hnuah AAPSU hian he ngenna hi an siam a ni. Education department chuan May 29 leh June 2 khan primary teacher, trained graduate teacher, post graduate teacher leh non-teaching staff te sawnna tur order hi an ti chhuak a ni. Sorkar dan siam tharah chuan khawpui chhunga kum riat emaw kum 9 lo thawk tawh zirtirtute chu thingtlanga sawn tur an nih thu leh, sorkar thu zawm lo hriatchhuah an nih chuan hrem theih an nih thu a puang zui bawk.