Assam : Dhubri khuaah bawngsa paih vangin buaina chhuak

Assam-a Dhubri khuaa Hanuman temple bulhnaia bawngsa paih a nih avangin buaina a chhuak a, thuneitute chaun buaina chhuak zel tur venna atan khawpui chhungah mi panga aia tam punkhawm leh kawng zawh khapna thupek an puang. Hei bakah thupek dang a awm leh hma chu dawr leh bazar hmunte khar vek tura tih a ni bawk.

Official-te sawi danin, Pathianni khan temple bulhnaiah bawng lu nia rinhlelh hmuh a ni a, he thil vang hian mipui lungawi lo chuan Dhubri Magistrate Colony leh New market huamchhungah thlai zuartute leh e-rickshaw driver te chu an bei a ni. Lungawi lohna lantira pungkhawmte hnawhdarh nan hian police-te chuan tear gas an hmang a, buaina thleng kaihhnawihah hmun hrang hrang aṭangin mi 16 an man tawh bawk.

Assam-ah hian bawngsa talh khapna dan hman a ni a, hetih lai hian Pathianni khan state chhunga hmun pangaah bawngsa paih hi hmuh a nih thu chief minister Himanta Biswa Sarma chuan a sawi. Bawngsa paih an hmuhna zingah hian Guwahati-a Cotton University pawn lam pawh a tel a ni. Dhubri khuaah hian temple bula bawngsa paih an hmuh hnu hian bazar hmun pakhatah bawng vun hi an hmu leh a, hei hian buaina a ti chhuak thar leh bawk a ni.

District magistrate Dibakr Nath chuan mipuite chu pawn chhuak lo tura ngenin, hemi rual hian hlauhthawn tur a awm loh thu a sawi. Dhubri-ah hian buaina chhuak tur venhimna atan central leh state aṭangin security dah an nih thu a sawi bawk.