Manipur : CM hluiin sorkar laipuiah state dinhmun thlen dawn

Manipur chief minister hlui N. Biren Singh leh, Bharatiya Janata Party (BJP) Rajya Sabha member, Leishemba Sanajaoba te chu Thawhṭanni khan state chhung buaina chungchang sorkar laipui hnena thlen turin New Delhi an pan.

Tun hnaiah Manipur-ah hian Meitei pawl, Arambai Tengngol hotu leh member ṭhenkhat man an nih avangin buaina leh tharum thawhna a chhuak thar leh a ni. Buaina chhuakah hian mi 11 in hliam an tuar a, valley huama district hrang hrangah khuahkhirhna puan a ni bawk.

Chief Minister hlui N. Biren Singh chuan sorkar laipui hruaitute chu state chhung dinhmun ṭha lo zual zel hriattir tura kal an nih thu sawiin, mipuite chu inlungrual taka awm a, tharum thawhna laka inthiarfihlim turin a chah. "Inlungrualna chu chakna a ni a, remna leh muanna a awm theihna turin theihtawp kan chhuah ṭheuh tur a ni," tiin a sawi.

Arambai Tenggol-in an hruaitu Asem Kanan Singh leh a thawhpui dangte man an nih vanga state puma ni 10 chhung shutdown an puan chu nimin khan an ti tawp. Mahse thu delhkilh awm loa Kanan Singh hi chhuah a nih loh chuan lungawi lohna lantir chhunzawm lehah an vau.