Assam: Bhutan Gelephu Mindfulness City aiawh 11 in CM hmu

Bhutan Gelephu Mindfulness City aiawh member 11 te chuan Assam leh Meghalaya tlawhin, Assam chief minister Himanta Biswa Sarma chu Lok Sewa Bhawan-ah nimin khan an hmu. Gelephu Mindfulness City project-a Core Working Group member-te bakah Royal Bhutanese Consulate General official-te pawh an tel a ni. Meeting-ah hian Assam leh Bhutan-in thawhdunna ṭha zawk an neih theih dan tur te an sawi ho bawk.

CM Sarma chuan Assam chuan prime minister Narendra Modi hmathlir zulzuiin Gelephu Mindfulness City Project chu a thlawp thu a sawi. State administration leh Bhutan Royal Government leh Core Working Group te chu thawh hona ṭha zawk neihpui a tiam a ni.

Project chuan zirna lama thawh hona, Assam leh Bhutan mipui inpawhna ṭha zawk a siam tur thu CM Sarma chuan a sawi. He project hi ṭhalai zirna, thiamna tih hmasawnna, entrepreneurship, cultural exchange leh thil dang tam takah a ṭangkai dawn hle a ni, a ti. Sarma chuan Assam tlawhtute chu state enkawl facility hrang hrang pawh thawh hona ṭha zawk a awm belh theihna tura tlawh turin a sawm bawk.