Meghalaya: Sonam leh Raja Raghuvanshi chhungte ngaihdam dil turin phut

Meghalaya minister Alexander Laloo Hek chuan Thawhlehni khan Sonam leh Raghuvanshi chhungte chu Meghalaya hming an tih chhiat avangin ngaihdam dil turin a phut a, defamation case file a nih tur thu sawiin, ni nga chhunga police-ten thil awmdan an chhui chhuah avangin a fak bawk.

Sonam Raghuvanshi hian Meghalaya-a an zinnaah a pasal, Raghuvanshi rawng taka thah tirin, Meghalaya police-ten amah hi an man zui a ni. Sonam hi court-ah a inlan a ni. He tualthihna thleng chungchangah hian Meghalaya bakah hmarchhak bial puh chhiatna tam tak a awm phah a ni.

Minister Laloo chuan Sonam-i pasal Raja Raghuvanshi ruang hmuh a nih hmain social media, national media leh Sonam leh Raja Raghuvanshi chhungte chuan dik lo takin Meghalaya hming an tih chhiat thu a sawi. Meghalaya police, sorkar leh vantlang an tih mualpho thu sawiin, he thil thleg hian a rilru a tih nat thu leh an enliam mai dawn loh thu a sawi. Meghalaya police-te hnathawh ṭhat zia sawiin, ni nga hnuah thudik an hai chhuak a, he tualthahnaa inhnamhnawihte chu na taka hrem an nih tur thu a sawi rualin, an state ti mualphotute lakah defamation case an thehluh tur thu a sawi bawk.

Raja leh Sonam Raghuvanshi-te hi innei thar hlim niin, May 20 khan Meghalaya-ah zinin, May 23 aṭangin chin hriat lohin an awm zui a, kar khat liam hnuah Raja ruang hi Wei Sawdong Falls, Sohra bulhnaiah hmuh a ni. Tualthahna kaihhnawhah hian Raja nupui Sonam bakah midang panga an man a, an zingah Sonam thurualpui Raj Kushwaha pawh a tel. Tualthat tura an rawih Akash Rajput, Vishal Singh Chauhan leh Anand Kurmi te chu Madhya Pradesh leh Uttar Pradesh-ah man an ni. An mi mante hi chhuizui turin Meghalaya-ah hruai an ni. He tualthahna hi Sonam leh Kushwaha ruahman a nih rin a ni a, rinhlelh kai lohn na turin Kushwaha hi Raja vuinaah pawh a tel a ni.