Manipur state pumah khawlaia chil chhak khap
Manipur-a Bishpur district-a khawlaia chil chhak khap a nih hnuin, he khapna hi state pumah hman zui a ni.
State health department chuan thupek tichhuakin, khawlaia chil chhak leh, vaihlo aṭanga thil siam chhuah ei leh ṭhial, paan masala leh areca nut eite chu khap a nih thu a puang. He khapna hi thupek dang siam leh hma chuan kenkawh a nih tur thu sawiin, hei hi Covid-19 darh tur venna atan leh, vantlang hriselna atana siam a nih thu department thuchhuah chuan a tarlang.
He khapna thupek bawhchhiate chu Disaster Management Act, the Epidemic Diseases Act, Manipur Epidemic Diseases COVID-19 Regulations, 2020 bakah Indian Penal Code 1860 leh Code of Criminal Procedure (CrPC) hnuaiah thubuai siamsak an ni ang.
Union health and family welfare ministry chuan April 15 khan state leh union territory hrang hrangte hnenah lehkha thawnin, khawlaia chil chhak mai mai chuan Covid-19 hri a tidarh thei a ni tiin, khap turin a lo ngen tawh a ni. Indian Council of Medical Research (ICMR) pawhin mipuite chu vaihhlo kaihnawih thilte ei leh ṭhial lo tur leh, khawlai chil chhak mai mai lo turin alo ngen tawh bawk.