Meghalaya: CBI-in NEHU professor man

Central Bureau of Investigation (CBI) chuan Meghalaya-a North Eastern Hill University (NEHU) senior professor chu Rs nuai 3.43 thamna sum a dawn avangin an man.

NEHU-a Zoology professor leh School of Life Sciences dean ni bawk, Nirmalendu Saha an man rual hian CBI chuan Pranjal Sharma, Guwahati-a supply firm-a thawk pawh an man tel nghal a ni.

CBI chuan thuchhuah siamin, Sharma leh Dr Saha bakah mi dang ṭhenkhat chu scientific equipment leh laboratory item supply order siamnaah thamna dawnga puh an ni a, hei bakah bill kaihnawihah dik lo taka thiltih a awm bawk niin an sawi. Puh an nih chungchangah hian information rintlak tak an dawn thu leh, hemi behchhan hian June 11 khan thubuai an ziahluh thu an tarlang.

Saha leh Sharma te man an nih theihna atan hian CBI chuan thang kamin, June 12 khan Gauhati University guest house-ah an man ta a ni. Pawisa an inhlanchhawng lai tak man an nih thu CBI chuan sawiin, Ningani khan Gauhati court-ah hruai nghal an ni. CBI chuan hmun pahnih an dapnaah an pawikhawihna document pawh hmuh a ni tih sawiin, NEHU complex-ah pawh finfiahna tur hi an dap leh mek bawk.

Dr. Saha hi nikum November thla khan NEHU vice-chancellor, Prabha Shankar Shukla-a'n university chhunga buaina chhuah hnua chawlh a lak avangin acting Vice- Chancellor atana ruat a ni.