Manipur : JNIM-ah service leh class an ṭan leh dawn

Manipur-a sorkar enkawl Jawaharlal Nehru Institute of Medical Sciences (JNIMS) chu tuilian leh ruahsur nasa avanga kar hnih chhung khar a nih hnuah, vawiin aṭang hian hawngin class pawh kal chhunzawm a ni tawh dawn.

JNIMS director Prof L. Usharani Devi chuan medical college and hospital-a healthcare service te chu chhunzawm a nih leh tawh tur thu hi a puang a ni. Service kalpui leh thuai theihna turin nasa taka hma an lak thu a sawi a, healthcare service bakah undergraduate (MBBS leh BDS) leh post graduate (PG) class pawh pangngai taka an kalpui leh tawh tur thu a tarlang. Tuilian leh ruahsur nasa avanga harsatna an tawh chungchangah staff, zirlaite leh stakeholder-te aṭanga thlawpna an dawn ṭhat avangin lawmthu an sawi a, thuneitute chuan healthcare changtlung zawk leh zirna ṭha zawk Manipur mipuite tan an chhawpchhuah chhunzawm tur thu Devi chuan a sawi bawk.

Army leh Assam Rifle te chuan thla hmasa leh tun thla tir lama ruahsur nasain tuilian a thlenah Manipur-ah hian mi 750 an chhanchhuak a, JNIM medical college and hospital aṭangin pawh an tel a ni. iMi nuai 1.66 velin harsatna tawkin mi panga an thi a ni.

May 29-a ruah a sur ṭan aṭang khan tuilianin state chhungah chenna in 35,429 ti chhiain, thingtlang khua 706-a thlai chinna hmun hectare 115.59 a ti chhe bawk. Tuilian vang hian ramsa 75 chuang an thi a, district hrang hrangah leimin 169 a thleng bawk. National leh state disaster response force, State Fire Service Department, Red Cross leh State Water Resources Department-te chuan chhiatna tawk mipuite chhanchhuah leh chhawmdawl hna nasa takin an thawk a ni.