Meghalaya : Senior professsor chungah NEHUTA lungawi lo

Meghalaya-a North-Eastern Hill University Teachers’ Association (NEHUTA) chuan Prof. Nirmalendu Saha, university-a senior professor leh School of Life Sciences dean ni bawk man a nih chungchanga an lungawi lohna an sawichhuak. Prof. Saha hi thamna sum a dawn kaihhnawihah Central Bureau of Investigation (CBI) ten Guwahati-ah an man a ni.

NEHUTA president Lakhon Kma chuan Prof. Saha hian man a nih lai hian Gauhati University exam-naah duty a neih avangin chawlh a lak thu sawiin, hemi rual hian report an dawnte chu a dik a nih chuan an pawl tan a hmingchhiathlak hle tih a sawi. NEHUTA chauh ni lo, university leh zirlaite zahawmna leh hmingṭhatna pawh a tih chhiat thu sawiin, a bik takin NEHU-in thla enge maw zat university chhunga buaina chinfel theih loh a awm laia hetiang thil a thleng chu pawi a tih thu a sawi. CBI chu chipchiar taka chhuichianna nei a, thudik tluantling pholang thuai turin NEHUTA chuan an ngen.

Prof. Saha hi kumin December 31 hian pension tawh mai tur a ni a, hetiang pawikhawihnaa a inhnamhnawih ta mai chu hriatthiam a har thu leh pawi a tih thu Kma chuan a sawi. NEHUTA president chuan eirukna an do zel tur thu sawiin, hetiang lama inhnamhnawihte chu an venghim dawn lo tih a sawi bawk.

June 11 khan CBI chuan Prof. Saha hi leh Guwahati-a supply firm-a thawk, Pranjal Sharma te chu thamna sum Rs nuai 3.43 an inhlanchhawn laiin Gauhati University Guest House-ah an man a ni.