Assam : Gas leak vangin chhungkaw 70 sawn chhuak

Assam-a Sivasgar district-a Oil and Natural Gas Corporation (ONGC) khur aṭanga gas a la put chhunzawm zel avangin a bulhnaia cheng, chhungkaw 70 chu relief camp-ah sawn chhuah an ni tawh.

ONGC Director (Technology & Field Services) Vikram Saxena kaihhruai team chuan kar liam ta Inrinni khan gas putna, Wll NO RDS 147 chu a hmuna tlawhin an lo enfiah tawh a ni. Gas put tih tawp a nih theihna atan hian Crisis Management Team (CMT) chuan theihtawpin hma an la mek tih an sawi.

Vikram Saxena chuan gas put avang hian kangmei chhuak a awm lo a, hliam pawh an awm lo tih a sawi a ni. Mahse gas putin a nghawng buai hi mi 1,500 vel an tling a ni. Anni hian gas rim hi hriain, an stove-te an on theih loh bakah mei an chhem thei lo bawk a ni. Hei vang hian heng mite hi ei tur siamsa sem an ni a, thil awmdan pawh thlithlai reng a nih thu official chuan a sawi bawk. Health Department leh Animal Husbandry Department aṭangin doctor-te pawh tirh an ni a, mihring leh an ranvulhte hriselna dinhmunte an enfiah a ni.

June 12 khan Well No RDS 147A aṭangin gas hi a put a, ONGC hnuaia mi ni mah se private firm, SK Petro Services chuan he khur hi an enkawl a ni. ONGC official chuan he khur aṭang hian gas lak chhuah a ni lo a, zone dang aṭanga lak chhuah tur kua an siam laiin gas hi a rawn put ta niin a sawi. Gas putna khur hi chhin phui an tum, an la ti hlawhtling thei rih lo a ni.