Meghalaya : Mipui himna leh venhimna dan khauh zawkin kalpui dawn

Meghalaya-a tun hnaia khualzinte tlawh tamna hmun, Sohra-a Indore mi sumdawng pakhat thah a nih hnuah, Meghalaya sorkar chuan Meghalaya Residents Safety and Security Act (MRSSA) 2016 chu ennawnin khauh zawka kalpui an tum.

State sorkar chuan dan bawhchhiatna thlengte venna ṭha zawka kalpui a nih theihna turin an dan hman mek chu tih chak a tum a ni. Hemi atana thutlukna hi cabinet meetingah an siam thu minister Alexander Laloo Hek chuan a sawi.

Minister chuan Meghalaya-a khualzinte chu an hming ziah luh zel a nih tur thu sawiin, state chhunga khualzinte tlawh tamna hmunah CCTV dah vek an tum thu te, hotel, homestay leh lodge-ahte pawh dah vek a nih tur thu a sawi bawk.

Tourism minister paul Lyngdoh pawhin MRSSA ennawn a nih thu hi sawiin, Sohra-a pawikhawihna thleng thlirin Meghalaya-a khualzinten pawi an khawih tur tih tawp an tum thu a sawi. Inner Line Permit chungchang pawh sawilangin, state assembly-in resolution a pawm tawh thu leh, Union Home Ministry pawmpuina an nghah thu a sawi a, state sorkarin theihtawp a chhuah mek a ni, a ti. Hemi rual hian ILP la tih fel ni lo mah se, state chuan MRSSA hnuaiah venhimna ṭha tak an neih thu a sawi.

Minister Lyngdoh chuan tourism app an neih tawh thu sawiin, khualzinte chet vel dan bakah an lirthei hmante, homestay, resort leh hotel-a thlengte chinchang an hriat theih thu a sawi. He app ho 50% hman a ni tawh a, tun aṭang chuan homestay, resort leh hmun danga khualzin thlengten an hman ngei ngei a ngaih thu a sawi bawk.

Sohra-a thil thleng vang chuan khualzin tlawhtu lamah nghawng a neih loh thu a sawi a, tlawhtu an la pung zel a ni, a ti. Meghalaya hminghliauna pawh chinfel a ni tawh a, an state tlawhtu pawh an la pung zel a beisei thu sawiin, Cherry Blossom Festival an hman turah pawh chhimtu nuai 20 vel an awm theih a beisei tih a sawi a ni.