Meghalaya: CM-in community centre 125 hawng

Meghalaya chief minister Conrad K. Sangma chuan Thawhlehni khan Garo Hills-ah Meghalaya Livelihood and Forest Ecosystem Management Project (MegLIFE) hnuaia community centre sak 125 a hawng.

MegLIFE project hi Japan International Cooperation Agency (JICA) aṭanga hmuh a ni a, ramngaw enkawlna leh Meghalaya-a district 12-a thingtlang khua 500-a khawtlang nun tih hmasawn chu an tum bulpui ber a ni.

Community centre-te hi vantlang mipuite kawng hrang hranga an hman ṭangkai tur, sum lak luhna kawngah pawh an chhawr theih tura duan a ni. Centre pakhat sakna atan hian Rs nuai 24 ṭheuh sen a ni a, project fund aṭangin Rs nuai 13 hmangin, state sorkarin Rs nuai 11 zel a pe ve bawk.

Hawnna hun hi virtual hmangin CM Sangma chuan Dobakoi Awemong, Baghmara C&RD Block, South Gari Hills-ah neiin, he project hmang hian ramngaw chhe tawhte thuam ṭhat, natural resource enkawl dan tih chak, thingtlanga chengte nitin khawsak phung tih hmasawn a nih tur thu a sawi. Ramngaw, tui lakna hmun leh ramte chu a neitu nihna chan changa humhalh turin mipuite a chah.

He project hnuaiah hian Meghalaya state pumpuiah community centre 452 sak a ni dawn a, Garo Hills-ah hian 150 aia tam sak a ni ang. Project hian community centre chauh ni lo, eizawnna siamna kawnga hmalakna tur dang pawh a kalpui bawk. Chungte chu nursery, plantation, minor irrigation dam, dug-out pond, plastic tank leh RCC tui dahkhawlna siamte a ni.