Sikkim : HIPEC enchhinna hlawhtling takin nei

Sikkim sorkar enkawl , Sir Thutob Namgyal Memorial (STNM) hospital-ah a vawikhatna atan Hyperthermic Intraperitoneal Chemotherapy (HIPEC) enchhinna hlawhtling takin an nei a, cancer enkawlna lamah hmasawnna ropui tak a ni.

HIPEC hi chhul cancer vei enkawl mek lai hnenah enchhin niin surgical team hi Gynae Oncosurgeon consultant Dr Romey Rai chuan kaihhruaiin, head of department Dr Nilima Pradhan leh anaesthesiology and critical care specialist Dr Anita Gurung ten an pui. Damlo pawh hi damdawi in aṭanga a chhuah tawh thu leh zawimuanga a dam chhoh zel thu an sawi.

HIPEC hi chhul, pumpui, colorectal leh peritoneal carcinomatosis cancer enkawlna niin in zai hmanga a bawk awmte an paih hnuah, chemotherapy damdawi chu pumpui chhungah an dah ṭhin a ni. He damdawi hian chemotherapy pangngaiin a tihdam kim loh cancer cell-te a that thei a ni. Chemotherapy chuan mihring taksa dangah nasa takin nghawng a nei ṭhin a, HIPEC erawh chuan cancer awmna hmunah chauh hna a thawk thung.

Dr Nilima Pradhan chuan HIPEC kalpui tura damdawi-in in hma a lak thu sawiin, hlawhtling taka kalpui a nih theihna tura training, inpekna leh thawhhona ṭha an neih avangin lawmthu a sawi. STNM Hospital-in cancer enkawlna ṭha leh changkang an nei ta chu ropui a tih thu a sawi bawk.