Nagaland : Dimapur rel station bulhnaia awmte sawnchhuah phut

Nagaland Tree Planters Association (NTPA) chuan state sorkar chu Dimapur rel station leh a bulhnaia dan loa ram luahte sawnchhuak turin an phut.

NTPA chuan mimal leh sumdawngte chu railway ramah dan loa awmin, in chhawng sang tak te an sak bakah an sumdawnna kudam-te an sa a, hei bakah petrol pump phalna nei loa sakte pawh a awm tih an sawi. Heng hmunte hi vantlang infrastructure tur atana tih a nih bakah, hmasawnna awm tur a tih ṭhuanawp thu an sawi.

NTPA chuan railway hman atana tih ramah pawh sakhaw lam inzirtirna hmun sak a nih thu sawiin, eng sakhua pawhin zah an phu a, mahse dan loa in sakte erawh a rang lama ṭhiat turin an phut. Sumdawnna emaw sakhuana emaw pawh nise dan zah a pawimawh zawk thu an tarlang.

A hmaa railway ram ṭhin, Dimapur Town Committee office hlui bulhnaia awm chu mi malin an luah vek tawh thu NTPA chuan an sawi bawk a, kum 1980 leh 1990 chho khan hmun pawimawh tak a ni ṭhin a, tunah chuan hnam rohlu a nihna a bo tawh a ni, an ti.

Dimapur rel station tih changtlun tumna a awm tak avangin NTPA chuan heng ram neih let chu thil pawimawh hmasa ber a nih thu an sawi a, an pawl chuan hmalak vat a nih loh chuan infrastructure tih hmasawn kawngah buaina a thlen dawn bakah, vantlangin sorkar-ah rinna an nei ngam dawn lo tih an sawi bawk. NTPA chuan tun hnaia Diphupar-a airport ram sorkarin a lak let leh chungchangah state sorkar an fak bawk a ni.