Assam sorkarin madrassa khar vek dawn

Assam sorkar chuan an state chhunga sorkar enkawlna hnuaia Muslim school/college, madrassa 600-te tihtawp vek an nihna tur bill chu nimin khan Assembly-ah a pharh. Hei hi eptu lam, Congress leh AIUDF chuan a dodal nasa hle. 

Education and finance minister Himanta Biswa Sarma chuan ni thum awh tur, Winter Session ṭanni ah  Assam Madrassas Education (Provincialisation) Act of 1995 hi a pharh a ni. He bill hi House-a pass a nih hunah, pre-independence Assam hunlaia Muslim League sorkarin a lo din, state sorkar kuta awm zui ta madrassa-te chu tihtawp vek an ni dawn tih minister chuan a sawi.

Congress leh  All India United Democratic Front (AIUDF) chuan bill hi na taka sawiselin, rorellai BJP sorkar chuan titawp mah se, nakkum Assembly inthlana thuneihna an chan hunah madrassa education chu bul an ṭan leh dawn tho tih an sawi thung. 

Bill pharhtu, Sarma chuan state chhunga madrassa-te enkawlna atan sorkar chuan kumtin cheng vaibelchhe 260 a seng ṭhin tih sawiin, sakhaw thil inzirtirna turin mipui sum chu a hmang zel thei tawh lo a ni, a ti.