Sharmila-i'n Malom Anniversary hmanpui

Manipuri rights activist Irom Chanu Sharmila-i chuan Malom Massacre 'anniversary' chu Nilaini khan a hmanpui.

Kum 2000-a Manipur, Imphal West district-a thihna rapthlak tak thlenna Malom Massacre-ah hian sipaite chuan civil mi 10 an kaphlum a, hei hian tun thlengin sawi a la hlawh hle. He thil thleng duh lohna lantirtu zingah Sharmila-i hi a langsar ber a, sipaiten Armed Forces Special Powers Act (AFSPA) hmanga civil mi an rinlelh zawng kahtheihna dan an nei chu a duh lo hle. Sharmila-i chuan AFSPA hlih a nih theih nana a hmalakna te sawi chhuakin, kum 16 chhung zet chaw nghei a kalpui chhunga amah thlawp tlat ṭhintute chungah lawmthu a sawi. Harsatna hrang hrang a paltlang thu sawiin, a tumah a hlawhtlin hma loh chuan heng martar mi 10-te leh civil mite tana a beih zel tur thu a sawi a ni.

Armed Forces Special Powers Act, 1958 chu tharum hmanga chinfel a nih loh thu sawiin, Sharmila-i chuan politics hmanga chinfel a tum thu a sawi.

A party din thar Peoples Resurgence and Justice Alliance (PRJA) chuan AFSPA hlih a nih theih nan hma a la zel dawn tih sawiin, a din chhan pakhat a nih thu a sawi lang bawk. PRJA hian nakkuma Manipur State Assembly-ah candidate eng emaw zat neih an tum a, Sharmila-i ngei pawh hian state chief minister O Ibobi Singh chu a dinna bialah khin a tum thu a sawi tawh a ni.