APCC-te'n state sorkar nawr zel

Arunachal Pradesh Congress Committee (APCC) member-te chuan Hayuliang constituency by-election neih tura state sorkar-in Congress candidate, Public Health Engineering and Water Supply (PHE&WS) department chief engi-neer Lapalum Kri-a'n Voluntary Retirement Scheme (VRS) a dilna a pawmsak duh loh avanga lungawi loin, Nilaini khan nawrh an huaihawt.

Hemi chungchangah hian APCC-te chuan Election Commission-ah an zualko dawn tih an sawi. APCC President Padi Richo chuan Nilaini khan state civil secretariat kawtah lungawi lohna an lantir thu sawiin, rorellai Peoples’ Party of Arunachal (PPA) leh North East Democratic Alliance (NEDA) te chet dan chu pawm theih a ni lo a ni, a ti. Lungawi lohna lantira pungkhawmte hian thuziak hrang hrang an keng a, state sorkar demna an au chhuahpui bawk. APCC-te chuan state chief secretary chu Kri-a ban dilna pawmsak turin nasa takin an nawr a ni.

Nilaini thleng kha Hayuliang constituency by-election atana nomi-nation file theih a ni a, hetih lai hian Congress high command-in official candidate atana an ruat Kri chu a hna aṭanga ban a dilna state sorkarin a pawmsak loh avangin Congress party an lawm lo hle. Hetih lai hian BJP ticket-a ding tur NEDA candidate WC Meter Reader-a'n VRS a dilna chu pawm sak a ni thung. He thil thleng duh lohna lantir hian, Arunachal Pradesh Congress Co-mmi-ttee (APCC) te chuan nimin aṭang khan Indira Gandhi Park, Itanagar-ah chaw nghei an kalpui ṭan leh a ni.