UNC-te'n kawngpui dan ti tawp

United Naga Council (UNC)-te'n Manipur sorkar-in Sadar Hills leh Senapati-te district pek a tum duh lohna lantir a, darkar 48 awh kawngpui danga nawrh an huaihawt chu Thawhlehni khan tih tawp a ni.

Naga-te chenna hmun hrang hranga kawngpuite chu dan a ni a, nunphung a khaihlak nasa hle. Manipur Chief Minister O Ibobi Singh chu Kangpokpi-a Kut festival-ah tel tura sawm ni mah se, UNC-te nawrh huaihawt avang hian a ṭhulh nia tarlan a ni. Kut festival-ah hian O Ibobi Singh hian Sadar Hills leh Senapati te chu district-ah a puan rin a ni a, mahse dodalna a nasat avangin CM hian a
ṭhulh leh ta niin tarlan a ni. Naga MLA-te chuan district-a puang lo turin CM an ngen nia sawi a ni a, district-ah puan luih a nih chuan banah an vau nia tarlan a ni bawk.

UNC-te chuan December 14, 1981 khan Naga aiawh leh Manipur sorkarte chuan inremna an lo ziak tawh tih sawiin, Manipur sorkar hian All Naga Students’ Association, Manipur (November 10, 1992), Manipur and Naga Students’ Federation (September 27, 1996), United Naga Council leh ANSAM (June 23, 1998)-te inremna a lo ziahpui tawh bawk a ni, an ti. Heng bakah hian Ministry of Home Affairs (MHA) chuan November 24, 2011 khan inremna a lo ziahpui tawh bawk. Inremna ziahte hi state sorkar chuan a palzut sak nia sawiin, Sadar Hills leh Senapati-te district-a hlankai chu United Naga Council (UNC)-te hian an dodal ta a ni.