Meghalaya : Sorkarin secretariat complex thar sak tur lungphum phum

Meghalaya sorkar chuan Tura-a secretariat complex thar sak tur lungphum a phum. Complex sakna atan hian Rs vbc 165.8 vel hman tura ruahman a ni.

Complex lungphum phumnaah hian chief minister Conrad K. Sangma bakah, deputy chief minister Sniawbhalang Dhar leh speaker Thomas A. Sangma te an tel a, hmasawnna hna thawwhna tur program enge maw zat tlangzarh a ni nghal bawk.

FOCUS (Farmers' Collectivisation for Upscaling Production and Marketing Systems) program pawh hawng telin, he program hmang hian Garo Hills-a Producer Group 4,610 ten Rs vbc 7.93 aṭangin hamṭhatna an dawng dawn a ni. He scheme hi lo neih leh thingtlang eizawnna tih chakna tura duan a ni.

Chief Minister chuan a bulṭhut aṭanga inrelbawlna siamṭhat kawnga sorkar inpekna tarlangin Jowai leh Pynursla-ah mini secretariat sak a nih tur thu a sawi. Tura facility thar hi sorkar scheme mipuite hnena hriattirna kawngah te, khua leh tui ten service an hman ṭangkai theihna tur leh department nen thawh hona ṭha neih theihna tura ruahman a nih thu a tarlang.

Program tlangzarh zingah hian sikul 10-a M-Tab semchhuah, zirlai hmeichhiate hman ṭangkai tur Digital Learning Aid Scheme leh sanitary pad vending machine zirna inah dahna turte a tel. CM Sangma chuan Awang Chips, lamkhuang aṭanga siam, Rongara PRIME Hub siamchhuah hmelhriattirna hun a nei a, state in economy hmasawnna atana a duan, Meghalaya Economic Inclusive Program (MEIP) leh CM Fellowship program sawi hawnna hun a nei bawk.