Arunachal Pradesh : NCERT textbook-ah Silluk khua pholang

Arunachal Pradesh-a East Siang district-a khaw lian lo tak, Silluk khua chu an khaw fai leh thianghlim avangin NCERT textbook-ah pholan a ni. He khua hi Class 3 zirlaibu, Environmental Studies (EVS) Chapter 12-a "Taking Charge of Waste" tihah tarlan a ni.

Bialtu MLA Oken Tayeng chuan a social media-ah thuchhuah siamin, NCERT textbook-ah an lan avangin Silluk khua leh mipuite a lawmpui thu a tarlang. MLA chuan Arunachal Pradesh tan pawh an chhuanawm hle tih sawiin, ramchhunga zirlai tam takte chuan an khaw hlutna, theihna leh an hlawhtlinna te an zir tawh dawn a ni, a ti.

Silluk khua hian Chief Minister's Award for the Cleanest Village chu vawi thum an lo dawng tawh bawk. NCERT textbook-a pholan a ni ta chu mellung pawimawh tak niin, Silluk chu ram pum huapa thingtlang khaw fai leh thianghlim kawngah entawntlak tia hriat a ni tawh dawn a ni.

MLA Tayeng chuan khaw fai leh thianghlim ni tura Kepang Nong Borang kaihhruaina hnuaia Swachh Silluk Abhiyan (SSA) hma lakna pawimawhna te a sawi lang bawk.

Silluk khaw mipuite hian an khaw thianghlimna atan hian theihtawpin tha an thawh ṭheuh a, bawlhhlawh ti ralna, a hman nawn theih ho recycle na leh bawlhhlawh tih tlem kawngah khaw mipui tinte hian hma an la vek a ni. SSA chairman, Kepang Nong Borang chuan hetiang chawimawina an dawng hi an lawm hle tih sawiin, hei hi khaw mite inlungrualna leh, leilung humhalh kawnga an inpekna rah chhuah a ni, a ti.