Assam: CM-in cabinet thutlukna puang

Assam chief minister Himanta Biswa Sarma chuan Pathianni khan cabinet thutlukna pawimawh tak pahnih - supervisor post-a Anganwadi worker reservation tih pun bakah state chhunga mahni nihna thlak thleng (transgender community) te social and backward class (OBC) status pek an nih tur a puang.

A hmain Anganwadi-ah supervisor post 25% hi Anganwadi worker tana dah a ni ṭhin. Mahse cabinet thutlukna angin reservation hi 50% in tih pun a ni dawn a, 50% dang la awm chu state-level recruitment process-a lak an ni dawn tih CM Sarma chuan a sawi.

Cabinet-in thutlukna lian tak a siam pakhat, mahni nihna thlak thleng (transgender community), third gender an tih bawkte OBS status pek chu khawtlangin a pawm theihna tura tih niin, he community-a Assam khua leh tui nihna dik tak neite chu identity card siamsak an ni dawn a ni. He thil hi Assam tan chhinchhiah tlak a nih thu CM Sarma chuan a sawi a, hei hi Supreme Court kaihhruaia pek zul zuia tih a nih thu a sawi bawk. SEBC category-ah a dah an ni dawn vangin transgender-te chuan hmasawnna leh hamṭhatnate an dawng ve thei tawh dawn a ni. Mahse he hamṭhatna dawng tur hian Assam khua leh tui nihna dik tak nei an nih a ngai thung a; state dang aṭanga pem lut, hnathawk tur leh zirna bakah thil dang vanga lutte chuan an dawng ve thei dawn lo tih CM Sarma chuan a tarlang.