Meghalaya : FOCUS scheme hnuaiah Rs vbc 19 pe chhuak

Meghalaya sorkar chuan thingtlanga chengte nitin khawsak tih hmasawnna tura duan, FOCUS ((Farmers’ Collectivisation for Upscaling Production and Marketing Systems) scheme hnuaiah Rs vbc 19 a pe chhuak. Heng zinga Rs vbc 8 chu Garo Hills-a Producer Group (PG) 4,600 hnenah sem a ni. Sorkar chuan a bulṭhut aṭanga vantlang inrelbawlna tih chak leh agrilculture hmasawnna turin hma a la zel a ni.

Tura-a Pa Togan Nengminja Sangma Athletic Stadium-a vantlang inkhawm buatsaihah chief minister Conrad K. Sangma chuan sum pek chhuah a nih thu hi a puang a ni. CM hian

Additional Secretariat Complex thar sakna tur lungphum a phum nghal bawk.

FOCUS hi Meghalaya-a thingtlang khaw tam takah ṭangkai taka kalpui mek niin, scheme kalpui a nih aṭangin Producer Group 22,500 chuang hnenah Rs vbc 120 vel an sem chhuak tawh. Official data-a a landanin he scheme hmang hian thingtlanga chenna in nuai 2.1 velin hamṭhatna an dawng tawh a, lo neih bakah vawk vulh, ar vulh leh horticulture lamah ṭanpuina nasa takin an lo kalpui tawh bawk a ni.

CM Sangma chuan loneitute theihna hriatpuiin, thingtlang economy tih hmasawnna tur a nih thu a sawi a, FOCUS chu one-time scheme ni loin hunrei tak chhung vantlang tih chak kawngah te, a bik takin hmeichhe eizawnna siamsakna tura duan a ni, a ti. Loneitu hmeichhia zinga 60% chuangin hamṭhatna hi an dawng tawh bawk.

Khasi leh Jaintia Hills-ah PG 10,000 hnenah Rs vbc 1.09 sem chhuah a ni tawh a, fund hi mi pakhat hnenah Rs 5,000 zel pek a ni. Sorkar chuan Meghalaya State Rural Livelihoods Society (MSRLS) hnuaiah Nokrek Midan Cluster Level Foundation hnenah Rs vbc 10 a lo pe tawh bawk a, hei hi Garo Hilla-a Self-Help Group 19,000 chuanga hmeichhia nuai 1.2 ten an chhawr thei dawn a ni.