Assam: Sorkarin district tinah health camp buatsaih dawn

Assam sorkar chuan mipuite hriselna dinhmun enfiah a, a mamawhte tan a hun taka enkawlna pek an nih theihna turin kumin October thla aṭang hian constituency tinah health camp a buatsaih dawn.

Thawhlehnia meeting neihah Assam chief minister Himanta Biswa Sarma leh State Health Department chuan ruahmanna siamte ennawnin, official-te chu camp neih tur hi Model Camp-a siam thei tura facility ṭul leh pawimawhte nena thuam vek turin an ti.

CM Sarma chuan a social media X-ah thuchhuah siamin, Assam-a constituency tinah health camp vawi nga ṭheuh buatsaih tum a nih thu sawi a, tualchhung mite hriselna endik leh a hun taka enkawlna an dawn theihna tura ruahman a nih thu a sawi. He hunah hian public leh private sector aṭanga doctor thiam tak tak ten mipuite hriselna an endik dawn a, damlo enkawl ngaite chu sorkarin puihbawmna a pek tur thu leh, health sector welfare scheme hrang hrang hnuaiah enkawlna an dawng dawn tih a tarlang bawk.

Sarma chuan camp-ah hian a thlawna counselling buatsaih leh, damdawi sem chhuah a nih tur thu a sawi bawk a, hriselna kawnga pawimawhte inzirtirna hun hman a nih tur thu a sawi.

Chief Minister hian Thawhṭanni khan Board of Directors of Assam Cancer Care Foundation meeting vawi 23-na, Sewa Bhawan, Guwahati-a neih a kaihruai bawk. Meeting-ah hian Lakhimpur Cancer Centre-a B.Sc. Nursing College dinna tur leh, State Cancer Institute, Guwahati-a PET-CT khawl thar dahna tur an pawm bawk. Hei bakah Assam Cancer Care Foundation hnuaiah Cancer Hospital pali chu December 2025 chhunga zawhfel hman turin an rel bawk a ni.