Sikkim : Minister-in SCU campus sak kum 17 chhung tih khawtlai sawisel

Sikkim education minister Raju Basnet chuan sorkar laipui chu Yangang-a Sikkim Central University (SCU) campus sak, kum 17 chhung zet tih khawtlai tawh chu a rang thei ang bera hma la turin a phut. Hun rei tak chhung tih khawtlai a nih tawh avangin zirlaite zirna thlenga a tih ṭhuanawp thu tarlangin, state chhunga zirna hmalam hunin a tuar phah dawn tih a sawi bawk.

Minister chuan university hi kum 2007 a sak ṭan a ni a, mahse tun thlengin luah theih loha a la awm thu leh Gangtok-a building hrang hrang luah hawhin zirna an kalpui ṭhin thu a sawi. An dinhmun chuan zirlai, thawktute leh state chhunga higher education hmasawnna turah harsatna a thlen a ni, a ti.

Zirlaiten campus ṭha tak an neih a pawimawh thu sawilangin, kum 17 chhung zet an nghah tawh avangin a beidawnthlak thu Basnet chuan a sawi a, sorkar laipuiin a ngaihthah reng chu a sawisel bawk. University tan parliament-ah bill pawm a nih tawh thu leh sorkar laipui aṭang pawha fund an dawn thu sawiin, heti chunga ngaihthah a ni reng chu a dem tih a sawi.

University campus sak thlawptu mi eng emaw zat an thih tawh thu leh, heng mite duhthusam tih hlawhtlin hun an nghakhlel hle tih a sawi. University campus puitling nei tura theihtawp chhuaha an beih ṭhinna chuan awmzia a nei lo a, tun dinhmunah chuan classroom, hostel, library, laboratory leh facility pawimawhte indaih lohna a nasat thu sawiin, Sikkim ṭhalaiteah beidawnna a thlen a ni, tiin a sawi.