Ngaihven hlawh Niyang-i video message

Delhi University-a law zirlai Arunachal Pradesh mi Niyang Pertin-i chuan, Delhi-a Jama Masjid an tlawh ṭuma hmarchhak mi an nih vanga harsatna an tawh dan video message chu social media-ah a dah. Video-ah hian Minister of State for Home Kiren Rijiju a tag-a, ngaihven a hlawh hle.

Niyang Pertin-i chuan,"Nilaini khan hmarchak zirlai ṭhenkhat chu Delhi-a Jama Masjid tlawh turin kan kal a, kei leh ka ṭhiante chu mobile phone kan ken avangin Rs 300 chawi turin min ti a ni. Midang pawhin phone an ken luh thu kan hrilh pawhin Rs 300 chawi tur hian min ti tlat a ni" a ti. He hmun tlawh vetute chu pawisa dil an ni ve lo a, eng vanga pawisa chawi tura tih bik nge an nih a hriatthiam loh thu Pertin-i chuan a sawi.

DU-a law zirlai Pertin-i chuan video message-ah hian, India khua leh tui an nih thu an sawi pawha duty-te'n an pawmsak loh thu leh, hmarchhak aṭanga kal an nih thu an sawi hnu pawha harsatna an tawh zui thu a tarlang. Pertin-i chuan amah ngei pawhin harsatna a lo tawh fo tawh thu sawiin, national museum a tlawh ṭum pawha identity card a phawrh thu leh harsatna a tawh dan te a sawilang bawk a ni.

MoS Home Kiren Rijiju chuan Niyang-i video message chu a hmuh thu leh, thil thleng chu pawi a tih thu sawiin, "Hmarchhak miten India ram hmun danga harsatna an tawh ṭhinte tihtawp a nih theih nan Home Ministry-ah thlen a ni ang" tiin Twitter-ah a tarlang.

Delhi Tourism website-ah chuan Jama Masjid-a thlalak man chu Rs 200 a nih thu tarlan a ni bawk.