Manipur-ah 'hearing aid' sem 'Guinness Book of World Records'-ah ziak lut

Manipur khawpui Imphal-a Khuman Lampak Indoor Stadium-ah kar kalta Inrinni khan ri hriatna lama harsatna nei mi 6,464 tan 'hearing aid' sem a ni a, a vai hian cheng vaibelchhe 4 man vel nia tarlan a ni. Khawvelah hetianga tam hi ṭum khatah sem chhuah a la ni ngai lo a, 'Guinness Book of World Records'-ah ziah luh a ni tih tarlan a ni bawk.

He hun hi Union Social Welfare Minister Thawar Chand Gehlot chuan a hmanpui. Chand Gehlot chuan hetiang camp hi Gujarat-ah buatsaih a lo nih tawh tih sawiin, mi 1,700 hnenah hearing aid sem a lo ni tawh a ni, a ti. Manipur-ah hlawhtling taka buatsaih a ni leh ta chu lawmawm a tih thu sawiin, hetiang anga tam hi tun hma lamin sem chhuah a la ni ngai lo tiin, ri hriatna lama harsatna nei mi 6,464 zet hnena an mamawh pek chhuah a ni chu ropui a tih thu a sawi.

Union minister chuan pianphnuga rualbanlote chu personal identity card hran pek an ni dawn tih sawiin, sorkar aṭangin hamṭhatna hrang hrang ngaihtuah sak an ni ang, a ti. Kum 2011 chhiarpuiah khan India ramah pianphunga rualbanlo mi vaibelchhe 2 dawn an awm a ni, a ti. Chand Gehlot chuan sorkar laipui chuan rualbanlo mi nuai ruk vel zet hnenah an mamawh bungrua pe chhuak turin hma a la mek tih sawiin, hemi atan hian sum tam tham tak ruahman a ni, a ti bawk.

Manipur-a pianphunga rualbanlote mamawh semchhuahna hi 'Guinness Book of World Records'-ah ziahluh a nih theih nan sorkar laipui chuan Guinness official-te an chahchhuak nia tarlan a ni. He hun hi Programme for Prevention and Control of Deafness, National Health Mission, Manipur, Artificial Limbs Manufacturing Corporation of India leh Ministry of Social Justice and Empowerment-te'n an buatsaih niin, sorkar laipui scheme 'Samajik Adhikarita Shivir and Distribution of Aids and Assistive Devices to Persons with Disabilities' hnuaiah kalpui a ni.