Assam-ah AFSPA thla ruk dang pawtsei

Assam-a Armed Forces (Special Powers) Act, 1958 hman mek chu sorkar laipui chuan thla ruk atan a pawtsei.

AFSPA hi Assam state pum leh a ṭhenawm state Meghalaya nen a inrina km 20 huam chhungah pawhsei a ni. Home Ministry chuan Assam-ah January-September 2016 chhungin buaina leh tharum thawhna a thleng fo tih tarlangin, dan leh thupek khauh zawka kenkawh a nih theihna turin AFSPA chu thla ruk atan pawhsei a nih thu a tarlang. Kum 2016 chhungin Assam-ah hian tharum thawhna leh inbeihna ṭum 66 thleng a awm tawh a, mi 29-in nunna an chan tawh a ni.

Assam-a pawikhawihna tam zawk hi April, 2015-a hel pawl pahnih, United Liberation Front of Assam (Independent) ULFA(I) leh National Demo-cratic Front of Bodoland (NDFB) inzawmkhawmin an din “United National Liberation Front of Western South East Asia (UNLFW)-te chetna a ni. UNLFW-te hi pawikhawihna thleng 57%-ah an inrawlh a ngaih a ni a, thihna thleng 84% zetah an inrawlh nia tarlan a ni.

August 5, 2016-a Kokrajhar market-a pawikhawihna thlengah khan UNLFW-te hi mawhphurtu berah ngaih an ni a, he thil thlengah hian civil mi 14 an thih bakah, mi 19-te'n hliam na tak an tuar a ni. Heng bakah hian Tinsukia district leh Charaideo district-a tharum thawhna thlengah an inhnamhnawih tih tarlan a ni bawk.

Armed Forces (Special Powers) Act, 1958, Section 3 hnuaiah Assam hi ‘disturbed area’-ah puan niin, November 3, 2016 aṭanga chhutin thla ruk dang hman leh turin AFSPA chu pawhsei a ni leh ta a ni. AFSPA hi hmarchhak state pariat leh Jammu & Kashmir-ah te hman mek a ni.