Assam Chief Minister : Sarbananda Sonowal

Assam Chief Ministe ni lai Sarbananda Sonowal hi October 31, 1961 khan Assam-a Dibrugarh district-ah a piang a, an chhungkua hi tribal an ni. Infiamna lamah chuan Football, Cricket leh Badminton-te a tuipui hle. Zirna lamah chuan Dibrugarh University aṭangin Bachelor Arts (English Honours) a zo a, hemi hnu hian Guwahati University aṭangin Bachelor of Laws (LLB) a zo leh a ni.

Political career

Sarbananda Sonowal hi Assam-a zirlai pawl hmasa ber leh lian ber All Assam Students Union-ah kum 1992 - 1999 chhung president a ni. Zirlai pawl aṭang hian politics luhchilhin, Asom Gana Parishad (AGP) a zawm. Kum 2001 khan a vawikhatna atan Moran constituency aṭangin MLA atan thlan tlin a ni. Kum 2004 khan Dibrugarh constituency aṭangin Lok Sabha member atan thlan tlin zui a ni a, kum 2009 thleng MP nihna hi a chelh. Kum 2011 khan Bharatiya Janata Party (BJP) a zawm a ni. Kum 2014-a State 16th Lok Sabha Election-ah khan BJP ticket-in Lakhimpur Constituency aṭanga thlan tlin zui a ni bawk.

Prime Minister Narendra Modi-a kaihhruai, National Democratic Alliance (NDA) sorkarah hmun pawimawh chang chho nghalin, Union Minister of State - Independent Charge atan ruat a ni. Hei bakah hian Union Minister for Sports & Youth Affairs leh Minister of State for Entrepreneurship and Skill Development nihna a lo chelh tawh bawk. Assam Assembly Election 2016-ah, kum 15 chhung zet ro lo rel tawh Congress Party chu BJP chuan lehthalin, Sonowal hi Majuli Constituency aṭanga thlan tlin a ni. BJP-in sorkarna siamin, Sarbananda Sonowal hi Assam Chief Minister 14-na atan 24 May 2016 khan lakluh a ni ta a ni.

BJP-ah National Executive Member niin, a kum phu loha politics-ah sulhnu a neih ṭhat avangin 'firebrand and dynamic youth politician' tia sawi a ni ṭhin. February 8, 2011-a BJP a zawm hnu lawk khan, State BJP Spokesperson atan ruat a ni a, tunah hian president ni lai a ni bawk.

Dan loa pemlutte khuahkhirh a duh

All Assam Students Union nawrna avangin sorkar laipui chuan, ṭhenawm ram Bangladesh aṭanga dan loa Assam-a lut ṭhinte dang turin 'Illegal Migrants (Determination by Tribunal) Act, 1983' (IMDT Act) chu a duang a, Sonowal hi sulsutute zinga mi a ni. IMDT Act hi Indian Parliament-in a pass a ni a, hetih hun lai hian Assam aṭangin MP an la awm lo. IMDT Act hi Assam-ah chauh hman a ni a, India ram hmun dangah chuan dan loa India lut turte danna dan 'Foreigners Act (1946)' hman vek a ni. He dan hnuaiah hian March 25 1971 hnu lama pemlutte chu Assam khua leh tui nihna pek theih an ni loh bakah, dan loa pemlutte dapchhuah a, an ramah thawnkir theihna a ni. MahseSupreme Court chuan July 12, 2005 khan Illegal Migrants (Determination by Tribunal) Act, 1983 chu a hlip a ni. Hei hi Sonowal duh loin, dan loa pemlut ṭhinte titawp tur hian Supreme Court-ah pawh a lo zualko tawh a ni. Assam-ah hian dan loa pemlut an tam avangin, kumina inthlan an hmachhawnah pawh khan Sonowal chuan, chief minister a nih chuan dan loa pemlut ṭhinte titawp tura hma a lak tur thu a lo sawi tawh a ni.

Khaikhawmna

1992 - 1999 : All Assam Students Union President nihna a chelh

1996 - 2000 : North East Students Organisation Chairman a ni

2001 : Moran Constituency aṭangin MLA atan thlan tlin a ni

2004: Dibrugarh Constituency aṭangin Lok Sabha MP atan thlan a ni

2005: Ministry of Home Affairs-ah Consultative Committee member atan ruat a ni

2006: Ministry of Commerce & Industry-ah Consultative Committee member atan ruat a ni

2011: Bharatiya Janata Party, National Executive Member atan thlan a ni

2011: Assam Bharatiya Janata Party Spokesperson leh General Secretary atan ruat a ni

2012: Assam Bharatiya Janata Party President atan thlan a ni

2014: Lakhimpur Constituency aṭangin Lok Sabha MP atan thlan tlin leh a ni

2014: Union Minister of State-Independent Charge atan ruat a ni

2016: Assam assembly election-ah BJP Chief ministerial candidate atan ruat a ni

May 24, 2016: Assam Chief Minister 14-na ni turin lak luh a ni