Manipur-a Sports University dinna hmun tur sorkar laipuiin a hnawl

Union minister of state for youth affairs and sports (independent charge) Vijay Goel chuan Manipur sorkarin National Sports University (NSU) dinna hmun atana a thlan chu hnawl a nih thu a sawi.

Union minister Vijay Goel chuan tun hnai khan NSU hmun tura state sorkarin a thlan, Thoubal district-a Yaithibi Loukon chu tlawhin, University din nana a remchan loh thu a sawi. "NSU hmun tura thlan hi kawng tam takah a fuh tawk lo, dan leh thupek kenkawh thlengin harsatna a thleng thei. Ram neitute zángnadawmna pek an nih loh bakah ram buai a tam hle a ni" Vijay Goel chuan a ti. State sorkar chu National Sports University dinna hmun tur ngaihtuah kawngah hma la chak tawk lo nia sawiin, ram buai lo leh hmun ṭha zawk ngaihtuah tura a duh thu a sawi.

Thoubal district-a Yaithibi Loukon chu tuilian lakah a him tawk lo nia tarlan a ni bawk. Goel chuan, “Manipuir-ah hian world class sports university din kan duh a, hmalak mek a ni. Nimahsela state sorkar chuan a hmun a thlang fel thei lo a, project kalpui ṭan theih a ni lo" tiin, tun thlenga Unversity dinna hmun tur thlan fel a la nih loh chungchangah state sorkar chu mawhphurtu a nih thu a sawi. Union Minister chuan Imphal West-a NSU dinna tura ruahman pakhat Koutruk chu CM nen an tlawh bawk.

Sports University dinna hmun tur hi kumin July thla khan enfiah a lo ni tawh a, state sorkar chuan ram acre 300 zeta zau Yaithibi Loukon-ah a ruahman. Chhan hrang hrang vangin a hmun tur chungchangah hian buaina a awm chho a, ram neituten an phut ang zángnadawmna pek an nih loh avangin dodalna nasa tak a awm bawk. Union minister Vijay Goel chuan National Sports University (NSU) dinna hmun tur chu sports ministry kutah dah a nih tur thu a sawi.