Manipur-ah pawl hrang hrangten nawrh huaihawt

Tun hnaia pawl hrang hrangte nawrh huaihawt vangin Manipur-ah nunphung a khaih-hlak nasa a, nitin mamawh lakkhawm kawngah harsatna a thleng mek nia tarlan a ni.

All Manipur Petroleum Product Transporters Associa-tion-te chuan November 1 aṭang khan IOC lakah lungawi lohna lantirin nawrh an huaihawt ṭan a ni. Imphal-Dimapur inkalpawhna chu kar kalta Zirtawpni khan Senapati district-ah dan a ni a, hei vang hian truck ṭhahnem tak an tangkhang. Pump-ah oil lei tur a awm loh avangin, mipuite chuan petrol leh diesel a black-a an lei a ngai a, a man a sang chak hle nia tarlan a ni.

United Naga Council (UNC)-te chuan state sorkarin Sadar Hills leh Jiribam-te district-a hlangkai tura hma a lak duh lohna lantirin, Imphal-Dimapur highway leh Imphal-Jiribam highway-te chu hun eng emaw chen an dang tawh bawk. District thar pek hi All Manipur United Clubs’ Organisation (AMUCO) chuan an duh loh thu an sawi bawk. Hetih lai hian All Tribal Students’ Union Manipur (ATSUM) chuan Manipur Uni-versity-a tribal-te tana seat hauhsak chungchangah lung-awi loin kawng hrang hrangin nawrh an huaihawt ve mek bawk. Jiribam District Demand Committee (JDDC)-te chuan Okram Ibobi Singh-a kaihhruai sorkar ch, district puitlingah hlankai an nih thuai theihna tura hma la tura an nawr ve reng bawk avangin buaina hi chinfel mai a harsat rin a ni.