Tripura Police-te'n sum cheleka puh BJP candidate an chhui November 19-ah by-election neih a ni dawn

Tripura Police-te chuan Khowai by-election neih tura BJP candidate, Tapan Kumar Pal chu vote zawn nana sum chelekah puhin, an chhui mek.

Police-te chuan returning officer leh sub-divisional magistrate aṭanga complaint thehluh a nih thu sawiin, BJP candidate Pal leh BJP vice-president Subal Bhowmik-te chu vote zawn nana sum che lek leh, mi ṭhenkhat hnena sokar hna pek tiamah puh an nih thu an sawi. Hmeichhe pakhat Subha Rani Barman chuan BJP hruaitute chuan vote tura thlemin, Rs 2,000 pek an tiam niin a sawi a, mipui hriata a puanzar leh si avangin BJP hruaitute lakah hian complaint thehluh a ni ta a ni. Rorel lai, Communist Party of India-Marxist (CPI-M) pawhin BJP hruaitu Bhowmik chu campaign-naa dan kalha sum chelekah puhin, a lakah complaint an lo thehlut ve tawh bawk.

Election Commission chuan Khowai by-election neih hun atan November 19 a ruat a, constituency pahnihah by-election hi neih a ni ang. Party hrang hrangten an candidate tur an puang tawh hlawm a, BJP chuan Tripura Civil Service Officer hlui Shista Mohan Das chu Barjala bialah an din tir dawn a, Tapan Kumar Paul chu Khowai bialah a ding thung ang. TMC chuan minister hlui Prakash Das leh CPI-M leader Manoj Das-te an thehchhuak ang. Left Front party chuan Jhumu Sarkar in Barjala leh district party secretary Biswajit Datta-te chu candidate atan an thlang fel tawh bawk.

Tripura-a by-election neih tura inbuatsaihna chuan a vawrtawp a thleng chho mek. BJP Tripura unit thupuangtu Mrinal Kanti Deb chuan campaign tur hian Union Minister of State for Agriculture and Farmers Welfare Sudarshan Bha­gat, Union Minister of State for Human Resource Develop­ment Mahendra Nath Pandey, Union Minister of State for Heavy Industries and Public Enter­prises Babul Supriyo, Assam Health Minister leh North East Democratic Alliance (NEDA) hruaitu ni bawk Himanta Biswa Sarma bakah, Rajya Sabha member Rupa Ganguly-te chu BJP tana campaign turin Tripura an pan thuai dawn tih a puang.

TMC lam pawh an party Vice President Mukul Roy leh West Bangal aṭangin an party hruaitu eng emaw zat chuan campaign turin Tripura an pan khawm thuai dawn. Hetih lai hian Congress pawhin, campaign tur hian AICC General Secretary C.P. Joshi bakah AICC Secretary Bhupen Bora-te chu an chahchhuak dawn nia tarlan a ni.