Hmarchhak state-te ramria venhimna tikhauh turin ngen

Myanmar leh Bangladesh ramah Covid-19 kai an pun belh zel avangin hmarchhak state hrang hrangte chu ramriah venhimna khauh zawka kalpui turin ngen an ni. 

Bangladesh-ah hri vang hian mi 120 chuang an thi tawh a, hei vang hian ramri vengtu Border Security Force (BSF) te chu Bangladesh aṭanga lut tur venga khauh zawka hma la tura ngen a ni. 

Manipur chief minister N Biren Singh chuan an state-a India-Myanmar border area, km 398-a thui chu uluk zawka ven a ngai tih sawiin, ramri hung hna pawh chak zawka kalpui a ni tih a sawi. Director General of Police L.M. Khaute hnenah hmun hrang hranga police checkpoint-te thuam chak turin a hriattir bawk. Manipur sorkar hian Myanmar ramri-ah duty pawh dah belh turin Assam Rifles a lo hriattir tawh bawk a ni.

 

Myanmar ramah hian Covid-19 kai hi mi 132 an awm tawh a, mi pangain an thihpui tawh bawk a ni. Ningani khan hri kai thar hi panga an awm a, an zinga pali chu Yangon bial ami niin, pakhat chu Mandalaya region ami a ni. Hri kai an pun belh zel avangin Yangon regional government chuan an bial chhunga khaw 45-ah June 18 thleng atan zing dar 10- tlai dar 4 curfew a puang tawh bawk. 

Assam health minister Himanta Biswa Sarma chuan an state-ah ni sarih chhung hri kai thar an awm loh hnuah, Ningani kha Covid-19 kai thar pakhat a awm leh tih a sawi. 

Assam-ah hian he hri kai hi mi 35 an awm tawh a, mi pakhatin a thihpui tawh. Hri kai 35 zingah 19 chu enkawl dam an ni tawh a, damdawi-in aṭangin chhuahtir an ni tawh a ni. 

Sarma chuan Bilasipura, Dhubri district-a mi pakhat chuan Covid-19 hi a kai thar tih sawiin, ani hi hri kai tawh pakhat nena inkungkaihna nei an ni tih a sawi. Dhubri district-ah hian hri kai hi mi panga an awm a, hotspot-ah puan a ni tawh a ni. 

Dbuhri bakah Golaghat, Marigaon, Nalbari leh Goalpara district-te pawh Covid-19 hotspot-ah puan an ni. 

Tripura chief minister Biplab Kumar Deb chuan an state-a Covid-19 kai pahnihte chu enkawl dam an ni tawh tih sawiin, test neih nawn leh hnuin an negative ve ve tawh tih a sawi. 

Covid-19 kai hmasa zawk chu enkawl dam a nih hnuin April 16 khan damdawiin aṭangin chhuah tir a ni tawh a, Tripura State Rifles sipai, kum 32 mi chu Ningani khan a test result a negative ve leh tih CM chuan a sawi. An state chu Covid-19 kai awm lohna a ni ta tih a sawi a ni. 

Sorkar laipuiin hriattirna a siam bawhzuiin, Tripura sorkar chuan khawlaia chil chhak leh zun a khap. Urban development department-in thuchhuah a tihchhuahah, khawlai leh vantlang hmuna chil chhak leh zungte chu Rs 100 leh Rs 200 chawitir zel an nih tur thu a sawi.