AAPSU-in sports infrastructure buaina chingfel turin ni 10 chhung pe

All Arunachal Pradesh Students' Union (AAPSU) chuan state sorkar, a bik takin Sports Department chu sports infrastructure leh inrelbawlna chungchanga an thil phutte ti hlawhtling turin ziak ngeia chhanna pe tura phutin, hemi ti chhuak turin ni 10 chhung hun an pe. An hun tiam chhunga tih hlawhtlin a nih loh chuan lungawi lohna lantir emaw, Sports Director office khar emaw a nih tur thu an puang.

Thawhlehnia Arunachal Press Club-a thuthar lakhawmtute an kawmnaah, AAPSU games and sports secretary Zentle Mosu chuan Chimpu-a Sange Lhaden Sports Academy (SLSA) sakna tur fund dawn a ni tawh chungin, infrastructure sak emaw enkawl zuina emaw a la awm loh thu a tarlang. Hemi chungchang hi langtlang taka kalpui an phut tih a sawi.

Mosu chuan infrastructure awm sa leh administrative srtucture te chu hman tlak loh leh ngaihthah an nih thu sawiin, hei vang hian AAPSU chuan district tinah District Sports Officer (DSO) siam an phut a, a lak dan turah pawh Arunachal Public Service Commission kaltlanga lak an phut thu a sawi bawk. Hei bakah infiammite enkawl turin coach leh instructor ruat an phut bawk a, SLSA mipa leh hmeichhe hostel-a warden awm lo pawh an vei thu an pawl chuan an tarlang. AAPSU chuan academy-a lut thei chin pawh tih pun an phut a, Changlang district-a Miao hmuna SLSA sak mek pawh zo fel thuai turin sorkar an ngen bawk a ni.