Assam sorkar-in APSC chhui turin SST din

Assam sorkar chuan Assam Public Service Commission member, thamna sum laa puh chhuina kal mek vil turin Special Supervisory Team (SST) a din.

APSC Chairman Rakesh Kumar Paul chu thamna sum laah puh a nih avangin, kar kalta Inrinni khan Dibrugarh district police-te chuan an lo man tawh a, police custody-ah ni 14 chhung hren a ni ang. Paul leh a unaupa te chenna in pawh police-te chuan an dap tawh a, member dangte pawh chhui zui mek an ni. Hemi vil tur hian state sorkar chuan member pathum awmna SST a din a, Additional Director General of Police (CID) Anil Kumar Jha chuan a ho dawn a ni. Member dang pahnihte chu Inspector General of Police (CID) Surendra Kumar leh Inspector General of Police (SB) R P Meena-te an ni.

Assam CID-te chuan Thawh-lehni khan APSC-a Strong Room leh Controller of Examinations-te chu an khar. APSC office-ah vek hian Assam police-te chuan pawisa ni ngeia hriat, hal ralna hnu 3rd Floor-ah an hmu tih an sawi a, chhui chian mek a ni. Office-a document pawimawh eng emaw zat chu halral a awm nia tarlan a ni bawk. Thawhlehni vek khan APSC member Basanta Doley-in chu dap a ni a, Doley hian peon Til Bahadur Chetri chu APSC Chairman man a nih hnu khan office-a document pawimawh ṭhenkhat halral turin a ti nia sawi a ni.

Dibrugarh district police-te chuan APSC chungchang hi an chhui mek a, mi pahnih an man tawh. State sorkar chuan APSC member zinga thamna sum dawng an awm nia sawi hi a ngai thutak hle a, Chief Minister Sonowal pawhin thamna sum la te chu dan anga na taka hrem an nih tur thu leh, eirukna kaihhnawiha inhnamhnawih sorkar hnathawkte chu hrem zel an nih tur thu a sawi.